الحمد لله الذي اعد نا مغفرة وتوفيقا . وعلمنا لسعا دتنا صبرا وثباتا . فحقا علينا الى الاخرة معادا ومفازا . اشهد ان لااله الاالله وحده لاشريك له . . واشهد ان محمدا عبده ورسوله المصطفى الذي استكثر فى يومه توبة واستغفارا . وارشد الناس الى ما فيه صلاحهم دينا ومعاشا .

اللهم صل وسلم على خير الانبياء والمرسلين . سيدنا محمد وعلى اله وصحبه اجمعين .

اما بعد : فياعباد الله. اوصيكم ونفسي بتقوى الله فقد فازالمتقون. وقال الله تعالى : اعوذ بالله من الشيطان الرجيم . يا ايها الذين امنوا اتقواالله حق تقاته ولاتموتن الا وانتم مسامون .

 

Sidang jumat Rahimakumulloh,

Monggo kito sareng-sareng anggen kito ningkataken taqwa dumateng Alloh Swt, artosipun kito ngelampahi sedoyo perintahipun Alloh lan nebihi dateng sedoyo awisan-awisanipun Alloh. Kanti taqwa kito bade wilujeng dunyo lan akherat.

 

Kaum muslimin ingkang minulyo, ing wekdal meniko kito sampun mlebet wonten ing tanggal 5 Wulan Romadlon ing tahun 1437 H. Kenyataan mekaten meniko, paring emut dateng kito bileh lampahipun wekdal ingkang sering mboten kito raosaken. Wulan romadlon kapengker kados nembe mawon kito tilaraken, nanging sakmeniko kito sampun  mlebet wonten ing wulan romadlon maleh.

Kanti mekaten, kados dene tiyang ingkang ngurus setunggalipun perusahaan, kulo lan panjenengan tentu lajeng ndamel itung-itungan, rugi punopo bathi. Alloh mboten badhe ngetang kathahipun bondo lan putro, nanging Alloh badhe nimbang antawisipun amal kesahenan lan doso.

Wonten ing surat As-Sajadah, Alloh SWT sampun dawuh:

 

ولو ترى اذالمجرمون ناكسوا رءوسهم عنذ ربهم ربنا ابصرنا وسمعنا فارجعنا نعمل صالحا انا موقنون .

 

Lan sekirane siro meruhi nalikane wong-wong kang doso iku podho ndungklukake sirah-sirahe ono ing Ngarsane Pengerane, kanti matur: Duh Alloh Pengeran kulo, kito sedoyo sampun sumerap lan miring ayat-ayat panjenengan. Milo kersoho Panjenengan kerso mangsulake kito sedoyo maleh wonten ing dunyo. Kito sedoyo meniko badhe nindaake amal ingkang sae. Kito sedoyo sakmeniko sampun sami yakin. (QS. As-Sajadah ayat 12)

 

Kaum muslimin, sidang jum’at ingkang minulyo,

Ayat kolowau nerangake kados pundi gelanipun tiyang-tiyang ingkang remen tumindak doso mbenjang wonten ing akherat. Niat lan tekadipun badhe nindaake amal kesahenan sampun keliwat. Kepingin wangsul maleh dateng donyo sampun mboten saget. Sekul sampun dados bubur. Ingkang kedah dipun lampahi lan dipun raosake inggeh meniko namung pidono lan sikso. Padahal pidono lan sikso meniko kangge sak lami-laminipun.

 

Poro sederek kaum muslimin ingkang dirohmati Alloh,

Milo saking meniko, wonten ing Wulan Romadlon monggo sareng-sareng kito anggep kados dene “papan gelo” lan kesempatan kangge wangsul. Menawi badhe gelo, sakmeniko wekdalipun, menawi badhe wangsul utawi tobat dateng Alloh, sakmeniko wekdalipun. Rasukan ingkang lethek kedah dipun kumbah utawi cuci, lajeng dipun setriko, supados wangsul dados busono ingkang bersih lan sehat. Mekaten ugi menggahipun kito ingkang rumaos lethek lan kotor amargi saking dosa-dosanipun. Wulan Romadlon menikolah sampun siap lan sumadyo dados “mesin cuci” nipun. Milo, sedoyo namung kantun wangsul dateng kesadaraan kulo lan panjenengan piyambak-piyambak.

Alloh sampun nyawisaken kesempatan emas dateng kito sedoyo kangge ngatah-ngatahake istighfar, taubat, dzikir lan tetep ningkataken amalan-amalan ingkang sholeh. Rosululloh SAW ngantos nerangaken tentang wulan Romadlon mekaten:

 

شهر كتب الله عليكم صيامه وسننت لكم قيامه فمن صامه وقامه ايمانا واحتسابا خرج من ذنوبه كيوم ولد ته امه

 

Artosipun: Wulan romadlon iku sasi kang Alloh majibake marang siro pasane, lan ingsun nyunahake kanggo siro tangine, tegese sholate. Mongko sing sopo wonge poso lan tangi sholat ing sasi iki kanti iman lan ikhlas kerono Alloh, kanggo deweke bakal metu piro-piro dosa, koyo ing dino naliko deweke dilahirake. (HR. Ibnu Majjah).

 

Poro sederek sidang jumat ingkang minulyo,

Kanti dasar hadis meniko, wulan Romadlon ugi saget kito wastani minongko “Wulan Pemutihan”. Artosipun wulan ingkang paring kesempatan dateng kito wangsul putih maleh dateng gesang ingkang tanpo dosa. Punopo maleh Rosululloh SAW sampun pareng jaminan bileh wiwit dinten ingkang kapisan saking wulan Romadlon meniko, pintu-pintu neroko dipun tutup lan pintu-pintu suwargo tansah dipun  bikak. Ing mriku lajeng wonten suworo saking langit ingkang ngundang-undang:

 

يا باغي الخير اقبل . ويا باغي الشر اقصر. ولله عتقاء من النا ر وذ لك فى كل ليلة

 

He.. wongkang tukang golek kebecikan, majuo siro!! He… wongkang tukang golek barang olo, maandego siro!! Lan Alloh iku kagungan jatah kanggo wong-wong kang dibebasake soko siksane neroko, lan iku dadi ing saben-saben wengine sasi wulan romadlon. (HR. Ibnu Majjah)

 

Kaum muslimin rohimakumulloh,

Kanti sedoyo keterangaan puniko wau, estunipun wulan Romadlon saget dipun sanepoake kados dene priyayi agung ingkang badhe rawuh kanti ngasto bantuan rupi punopo kemawon. Kulo lan panjenengan namung kantun mastani badhe nyuwun punopo. Pramilo monggo, kulo lan panjenengan estu-estu kedah sampun nyiapake panyuwunipun. Sakmeniko, kontenipun panyuwunan sampun dipun bikak. Ing antawisipun kulo lan panjenengan mbok bileh wonten ingkang kepingin dipun gampilake sedanten urusanipun, gampil rizkinipun, kepingin nyuwun jodoh utawi putro. Wonten maleh ingkang nyuwun saget dipun lunasake utang-utangipun, dipun sehatake badanipun, dipun gampilake anggenipun pados rizqi ingkang halal lan barokah, utawi sakwernipun kabegjan donyo lan akherat. Insya Alloh sedoyo meniko badhe dipun kabulaken wonten ing wulan Romadlon, tergantung kulo lan panjenengan anggenipun ngrungkebi sedoyo pengibadahanipun kanti iman lan ikhlas. Ingkang cetho, wulan romadlon paring kesempatan werni kalih, inggeh meniko leburipun dosa, lan bebasipun kawulo saking siksanipun neroko.

Mugio kulo lan panjenengan klebet tiyang ingkang tansah pikantuk rohmat soho berkahipun Alloh, sehinggo saget netepi rupi-rupinipun pangibadahan. Amiin, Amiin, Ya Robbal ‘Aalamiin….

 

بَارَكَ اللهُ لِيْ وَلَكُمْ فِي القُرْآنِ العَظِيْمِ وَنَفَعْنِي وَإِيَّاكُمْ بِمَا فِيْهِ مِنَ الآيآتِ وَالذِّكْرِ الحَكِيْمِ، أَقُوْلُ قَوْلِي هَذَا، وَأَسْتَغْفِرُ اللهَ العَظِيْمَ لِي وَلَكُمْ وَلِسَائِرِ المُسْلِمِيْنَ مِنْ ذَنْبٍ، فَاسْتَغْفِرُوْهُ، إِنَّهُ هُوَ الغَفُوْرُ الرَّحِيْمُ